Ár 2008, föstudaginn 12. desember kom stjórn Faxaflóahafna sf. saman til fundar í fundarherbergi hafnarstjórnar í Hafnarhúsinu við Tryggvagötu og hófst fundurinn kl. 09:00.
Fundur nr. 56
Ár 2008, föstudaginn 12. desember kom stjórn Faxaflóahafna sf. saman til fundar í fundarherbergi hafnarstjórnar í Hafnarhúsinu við Tryggvagötu og hófst fundurinn kl. 09:00.
Mættir:
Júlíus Vífill Ingvarsson
Dagur B. Eggertsson
Guðmundur Gíslason
Þorleifur Gunnlaugsson
Sæmundur Víglundsson
Hallfreður Vilhjálmsson
Varafulltrúar:
Ólafur R. Jónsson
Sveinbjörn Eyjólfsson
Áheyrnarfulltrúar:
Sigríður Sigurbjörnsdóttir
Guðni R. Tryggvason.
Auk þess sátu fundinn: Gísli Gíslason, hafnarstjóri, sem jafnframt ritar fundargerð, Jón Þorvaldsson, forstöðumaður þróunarmála, Guðmundur Eiríksson, forstöðumaður tæknideildar og Vignir Albertsson, skipulagsfulltrúi.
1. Umsókn Þorleifs Friðrikssonar, sagnfræðings dags. 24.10.2008 um styrk vegna útgáfu annars bindis sögu Verkamannafélagsins Dagsbrúnar.
Hafnarstjórn samþykkir að veita styrk að fjárhæð kr. 250.000.
2. Erindi Gunnars Jóhanns Birgissonar, hrl. f.h. Hringrásar hf. dags. 13.11.2008 um aðilabreytingu á lóðinni Klettagarðar 9 til Skandinvest hf.
Hafnarstjórn samþykkir að falla frá forkaupsrétti vegna umbeðinnar breytingar á eignarhaldi með venjulegum fyrirvara varðandi nýtingu lóðar og deiliskipulag.
3. Erindi forstjóra Olíuverzlunar Íslands hf. dags. 20.11.2008 um frestun framkvæmda á lóðinni Klettagarðar 27.
Hafnarstjórn samþykkir að heimila frestun á framkvæmdum á lóðinni og felur hafnarstjóra að ganga frá samkomulagi við OLÍS þar að lútandi.
4. Erindi Húsafriðunarnefndar ríkisins dags. 16.10.2008 og 6.12.2006 um friðun verbúðanna við Grandagarð. Svarbréf hafnarstjóra dags. 13.12.2006.
Hafnarstjórn getur fallist á friðun verbúðanna á Grandagarði hvað varðar ytra útlit, enda lýtur það nú þegar borgarvernd. Unnið hefur verið að endur¬bótum á ytra byrði húsanna á grundvelli teikninga Hjörleifs Stefánssonar, sem samþykktar hafa verið af Minjavernd Reykjavíkurborgar, Húsafriðunar¬nefnd og byggingarfulltrúa Reykjavíkurborgar. Gert er ráð fyrir að þeim endurbótum ljúki á árinu 2010.
5. Erindi borgarráðs Reykjavíkur og Innri endurskoðunar Reykjavíkurborgar dags. 14.11.2007 varðandi innri endurskoðun Faxaflóahafna sf.
Hafnarstjórn samþykkir að fela formanni hafnarstjórnar og hafnarstjóra að ganga til samninga við Innri endurskoðun á grundvelli þeirra samnings¬draga sem fyrir liggja. Lögð er áhersla á að endurgjald taki mið af umfangi og endurgjaldi fyrir endurskoðun fyrirtækisins.
6. Níu mánaða uppgjör m.v. janúar – september 2008.
Hafnarstjóri gerði grein fyrir helstu liðum uppgjörsins. Lagt fram.
7. Gjaldskrá Faxaflóahafna sf.
Afgreiðslu frestað til aukafundar hafnarstjórnar föstudaginn 19. desember kl. 12:00.
8. Umsókn ABZ-A fyrir hönd óstofnaðs hlutafélags dags. 8.12. 2008 um lóð við Ægisgarð merkt R15 á deiliskipulagsuppdrætti ásamt fylgigögnum. Sótt er um heimild til þess að byggja á lóðinni hótel ásamt húsnæði fyrir ýmis konar þjónustu.
Hafnarstjórn samþykkir að óska eftir umsögn skipulagsráðs Reykjavíkur um erindið, en ljóst er að það hefur í för með sér breytingu á deiliskipulagi Mýrargötureits. Verði sú umsögn jákvæð er fallist á að ganga til viðræðna um málið enda verði þá gerð nánari grein fyrir fjármögnun, eignaraðild og framkvæmdatíma.
9. Aðalfundarboð vegna Eignarhaldsfélagsins Spalar hf. og Spalar ehf. ásamt ársreikningi og ársskýrslu 2008.
Lagt fram.
10. Önnur mál.
a. Jólakortastyrkur Faxaflóahafna sf.
Formaður stjórnar greindi frá því að ákveðið hafi verið að afhenda Mæðrastyrksnefnd jólakortastyrk Faxaflóahafna sf.
Fleira ekki gert,
fundi slitið kl. 10:30
