Faxaflóahafnir sf. taka þátt í verkefni með Íslenska sjávarklasanum þar sem ungu háskólafólki er gefinn kostur á að vinna að rannsóknarverkefnum varðandi sjávarútveg. Eitt af þeim verkefnum er að leggja mat á umfang sjávarútvegs á athafnasvæði Faxaflóahafna sf. og skoðun á umfangi og áhrifum atvinnugreinarinnar á svæðinu. Nú liggur fyrir skýrsla ungs hagfræðinema, Ásgeirs Friðriks Heimissonar, en skýrsluna vann hann á vordögum. 
Niðurstöður Ásgeirs Friðriks eru um margt fróðlegar og einsýnt að áhrif sjávarútvegs á starfssvæði Faxaflóahafna sf., þ.e. í Reykjavík og á Akranesi, eru veruleg. Helstu niðurstöður hans eru eftirfarandi:
1. Beint framlag sjávarútvegsfyrirtækja í Reykjavík og á Akranesi árið 2011 var 19,3% af beinu framlagi sjávarútvegs á landsvísu.
2. Heildarumfang sjávarútvegsfyrirtækja í Reykjavík og á Akranesi árið 2011, þ.e. bein og óbein áhrif og eftirspurnaráhrif meðtalin, var 19,5% af heildarumfangi sjávarútvegs það ár.
3. U.þ.b. 70% af óbeinu framlagi sjávarútvegs var myndað í Reykjavík árið 2011.
4. Hlutfall sjávarútvegs af landsframleiðslu í Reykjavík og á Akranesi árið 2011 var 5,1%.
5. Árið 2011 var 12,9% af afla Íslendinga landað í Reykjavík og á Akranesi, þar af 20,2% af botnfiskafla.
6. Afli sem hlufall þorskígilda sem landað var í Reykjavík og á Akranesi árið 2011 var 18,6% af heildarafla í þorskígildum.
7. Aflamark stærstu sjávarútvegsfyrirtækja í Reykjavík og á Akranesi fyrir fiskveiði árið 2011/2012 var 17,3% af úthlutuðu aflamarki í þorskígildium.
8. Útflutningur sjávarafurða frá Reykjavík og Akranesi sem hlutfall af heildarútflutningi sjávarafurða voru árið 2011 37,5%.
9. Um 1.900 manns starfa beint við sjávarútveg á höfuðborgasvæðinu sem er 21,1% af þeim sem starfa beint við sjávarútveg á landinu.
10. Í heild voru u.þ.b. 12.800 til 19.800 störf sem mynduðust á stór höfuðborgasvæðinu vegna starfsemi sjávarútvegs árið 2011.
Um leið og Ásgeiri Heimi er þakkað framlag hans og vinna þá má sjá skýrslu hans HÉR.
