Útisýning við Reykjavíkurhöfn í allt í sumar

Faxaflóahafnir hafa opnað umfangsmikla útisýningu á Miðbakka Reykjavíkurhafnar sem varpar ljósi á þróun sjóslysa við Íslandsstrendur síðasliðin 150 ár, frá árinu 1870 til okkar daga. Sýningin er opin í allt sumar, eða fram til októberloka.

Sjóslys við Ísland byggir á umfangsmikilli heimilda- og rannsóknarvinnu og sýnir á myndrænan hátt sögu skipa yfir 12 tonn að stærð sem fórust eða skemmdust svo mikið að þau urðu ekki sjófær á ný. Markmiðið er að gera almenningi kleift að sjá með skýrum hætti hvernig sjóslys hafa þróast í takt við breytingar á skipastól, fiskveiðum, siglingum og öryggismálum á sjó.

Á sýningunni eru hundruð sjóslysa kortlögð og sett fram með grafískum hætti sem gerir gestum kleift að fylgjast með þróuninni í gegnum meira en eina og hálfa öld íslenskrar sjósögu.

Minning um þá sem ekki snéru heim

Þessi sýning er ekki aðeins samantekt á skipströndum og sjóslysum. Hún er jafnframt minning um þá sem lögðu líf sitt í hættu við Íslandsstrendur og þá sem ekki snéru heim úr ferð sinni. Höfundar vilja varðveita þessa sögu og gera hana aðgengilega nýjum kynslóðum í samstarfi við Faxaflóahafnir sem einnig vilja deila þessari sögu.

Sérstök áhersla er lögð á þá atburði sem höfðu mest áhrif á slysasöguna, þar á meðal stórslys tengd veðurhamförum, aukna umferð erlendra fiskiskipa við Ísland og áhrif heimsstyrjaldanna á siglingar við landið. Umfangsmiklar upplýsingar áður ókunnar hafa komið fram um frönsk skip og hefur þeim verið bætt inn á þessa sýningu.

Franskir fiskikútterar, breskir og þýskir togarar

Á síðari hluta 19. aldar voru franskir fiskikútterar áberandi við suður- og suðausturströnd landsins og skip þeirra koma víða við sögu á sýningunni. Eftir aldamótin 1900 tóku breskir og þýskir togarar við sem fjölmennasti hópur erlendra skipa sem fórust við Íslandsstrendur.

Samhliða aðalsýningunni geta gestir nálgast nánari upplýsingar um einstök skip og sjóslys á sérstökum upplýsingaspjöldum sem staðsett eru í sýningarstöndum á Miðbakka.

Við gerð sýningarinnar var stuðst við bestu fáanlegu heimildir, bæði íslenskar og erlendar. Leitast hefur verið við að sannreyna upplýsingar eftir fremsta megni, enda geta eldri heimildir verið bæði ófullkomnar og misvísandi.

Sýningin opin allan sólarhringinn í allt sumar

Sýningin Sjóslys við Ísland er opin öllum í allt sumar, dag og nótt, alveg fram til októberloka.

Höfundar sýningar eru þeir Guðjón Ingi Hauksson, sagnfræðingur, Guðmundur Viðarsson, ljósmyndari og sýningastjóri, og Agnar Jónas Jónsson, skipasmiður. Kortagerð annaðist Hans Hansen.

Sjóslys við Ísland er tileinkuð minningu þeirra þúsunda sjófarenda sem hafa orðið fyrir sjóslysum við Íslandsstrendur frá upphafi vélaaldar til okkar daga.

🔵Sjóslys við Ísland

📅 Júní-Október

🌇 Opin öllum, allan sólarhringinn

📍Miðbakki - Gamla höfnin, Reykjavíkurhöfn