Þórður Már Sigfússon ráðinn skipulagsfulltrúi Faxaflóahafna

Þórður Már Sigfússon hefur verið ráðinn skipulagsfulltrúi Faxaflóahafna og hefur þegar hafið störf.

Þórður kemur til Faxaflóahafna frá umhverfis- og skipulagssviði Reykjavíkurborgar þar sem hann starfaði sem verkefnistjóri deiliskipulagsáætlana síðastliðin fjögur ár. Þar áður starfaði hanns skipulagsfulltrúi í samlagi fimm sveitarfélaga á Vestfjörðum; Dalabyggð, Strandabyggð, Reykhólahreppi, Kaldrananeshreppi og Árneshreppi.

“Ég hef tekist á við fjölbreytt og krefjandi verkefni á mínum ferli í skipulagsmálum. Í starfi mínu hjá Reykjavíkurborg sá ég frá fyrstu hendi hversu lykilhlutverki eining á borð við Faxaflóahafnir gegnir, ekki aðeins í daglegri starfsemi borgarinnar heldur einnig með tilliti til framtíðarþróunar hennar. Hlutverk hafnanna nær langt út fyrir borgarmörkin, enda er starfsemi Faxaflóahafna á landsbyggðinni jafnframt mikilvægur þáttur í byggðaþróun, atvinnulífi og samspili skipulags, samgangna og hafnarstarfsemi.” segir Þórður Már Sigfússon.

Þórður er BS-gráðu í landfræði og meistaragráðu í skipulagsfræði.

Faxaflóahafnir reka umfangsmestu hafnir landsins á starfsvæðum sínum í Reykjavík, Akranesi, á Grundartanga og í Borgarnesi. Félagið tengir stærsta markaðs- og atvinnusvæði Íslands við umheiminn og miðin með öruggum, grænum og skilvirkum höfnum. Rúmlega 80 manns starfa hjá fyrirtækinu sem leggur áherslu á að vera leiðandi í umhverfis- og öryggismálum og er í vegferð að þróa snjallar og sjálfbærar hafnir framtíðarinnar.