Ný farþegamiðstöð fær nafnið Vör
Metþátttaka í nafnasamkeppni Faxaflóhafna. Ný fjölnota farþegamiðstöð í Reykjavík – sem tekur á móti fyrstu farþegum skemmtiferðaskipa nú í vor og hýsir fjölbreytta viðburði og veislur utan annatíma skemmtiferðaskipa á veturna – hefur hlotið nafnið Vör.
Faxaflóhafnir, sem reisa farþegamiðstöðina, leituðu til almennings um nafn á nýja húsinu. Nafnasamkeppni var sett af stað í upphafi árs þar sem skilafestur tillagna var 1. febrúar. Óhætt er að segja að áhugi þjóðarinnar á að leggja Faxafóhöfnum lið við að finna nafn á farþegamiðstöðina hafi verið mikill því alls bárust 6.025 nafnatillögur frá 3.384 einstaklingum. Hér er á ferð Íslandsmet í sögu nafnasmkeppna hérlendis, bæði í fjölda tillagna og þáttakenda.
Dómnefnd hafði það meðal annars að leiðarljósi við val á nafinu að það skyldi vera þjált, falla vel að íslenskri málhefð og væri ekki tungubrjótur fyrir þau sem tala önnur mál eins og tilgreint var á vefsíðu samkeppninnar, nafnasamkeppni.is
“Fyrir hönd Faxaflóahafna og allra sem koma að því að reisa þessa nýju fjölnota farþegamiðstöð í Reykjavík vil ég þakka fyrir þennan mikla áhuga og þátttöku í nafnasamkeppninni. Dómnefndin hafði úr fjölda góðra tillaga að velja og ég er afskaplega sáttur við að húsinu hafi verið fundið þetta fallega og viðeigandi nafn. Vör ber með sér skýra tengingu við hafið og hlutverk hússins, sem lendingarstaður skipa og ferðalöngum skjól.”– Gunnar Tryggvason, hafnarstjóri
“Sem formaður dómnefndar þakka ég öllum kærlega fyrir þátttökuna. Það var gaman að sjá hve margar frábærar og frumlegar tillögur bárust og dómnefndin ræddi þetta fram og til baka en við erum hæstánægð með niðurstöðuna. Vör er fallegt rótgróið orð úr íslenskri menningu, sem ný kynslóð fær nú að kynnast. Orðið þýðir lendingarstaður báta, Vör er líka gyðja visku og varkárni í Norrænni goðfræði (og gleymum því ekki að vits er þörf þeim er víða ratar) og svo býður orðið líka upp á skemmtilega orðaleiki og við vonum að fólk hlakki til að mæta í veislu í Vör með bros á vör. ”
– Vigdís Hafliðadóttir, listamaður, heimspekingur, sjónvarpskona, textahöfundur og formaður dómnefndar
Alls bárust 115 tillögur um nafnið Vör og var það þriðja algengasta tillagan. Í samræmi við auglýstar reglur var rökstuðningur látinn ráða ef bærist sama tillaga frá mörgum þátttakendum og þar sem dómefnd mat rökstuðning nokkurra innsendinga bera af, var hlutkesti látið ráða milli þeirra. Í þeim vendingum var Vala Steinsdóttir hlutskörpust og í rökstuðningi hennar segir;
“Vör er staður komu og samveru. Skjól við sjóinn þar sem ferðalangar, borgarbúar og hugmyndir mætast, allt árið um kring. Vör er rótgróið íslenskt orð sem vísar til lendingar, móttöku og skjóls við sjó. Nafnið á sér djúpar tengingar við siglingar og komu til landsins og endurspeglar þannig hlutverk farþegamiðstöðvarinnar á skýran og táknrænan hátt. Um leið er Vör stutt, hljómfagurt og auðvelt í framburði fyrir fólk af ólíkum tungumálabakgrunni. Nafnið fellur vel að íslenskri málhefð en er jafnframt alþjóðlega aðgengilegt. Vör nær utan um bæði virkni hússins yfir sumartímann og hlutverk þess sem samkomu- og menningarrými yfir vetrarmánuðina.”
Íslandsmet í fjölda þátttakenda
Árið 2009 efndu Reykjavíkurborg og íslenska ríkið til samkeppni um nafn á nýtt tónlistar- og ráðstefnuhús þar sem 4.157 tillögur bárust frá 1.200 einstaklingum og húsið fékk nafnið Harpa. Árið 2023 fékk nýtt hús fyrir skrifstofur Alþingis nafnið Smiðja í kjölfar nafnasamkeppni þar sem 826 tillögur bárust frá 502 aðilum. Sama ár fékk hús íslenskunnar, Edda, nafn sitt eftir samkeppni þar sem 3.400 tillögur bárust, frá 1.580 einstaklingum. Aldrei fyrr hafa jafn margir tekið þátt í nafnasamkeppni hérlendis og fyrir nýja farþegamiðstöð Faxaflóhafna þar sem 6.025 tillögur bárust frá 3.384 einstaklingum.
Miðstöð farþega og mannamóta við Viðeyjarsund
Vör tekur á móti fyrstu farþegum skemmtiferðaskipa í vor og í haust taka svo við annarskonar mannfagnaðir og veislur. Farþegamiðstöðin tryggir betri þjónustu við ferðamenn og styður markmið Faxaflóahafna um fjölgun skiptifarþega; þeirra sem hefja eða ljúka skemmtisiglingu sinni hérlendis, dvelja lengur á landinu og skapa aukin verðmæti fyrir íslenskt efnahagslíf.
Opnun farþegamiðstöðvarinnar markar tímamót í móttöku skemmtiferðaskipa á Íslandi og leysir af hólmi þá tímabundu og takmörkuðu aðstöðu sem fyrir er á hafnarsvæðum Faxaflóahafna. Hér er á ferð fyrsta farþegamiðstöðin hérlendis sem sérhæfir sig í þjónustu við farþega skemmtiferðaskipa og jafnframt fyrsta farþegamiðstöðin sem rís í Reykjavík í 60 ár eða frá opnun Bifreiðastöðvar Íslands, BSÍ, árið1965.
Utan annatíma skemmtiferðaskipa, frá október og út mars ár hvert, fær farþegamiðstöðin annað hlutverk sem vettvangur fjölbreyttra viðburða, veislna og samkoma. Faxaflóhafnir tilkynntu í fyrra um samstarf við Múlakaffi um nýtingu hússins yfir vetramánuðina og hafa bókanir gengið vonum framar. Húsið rúmar allt að 2.000 veislugesti, um 900 manns í sæti, og njóta gestir stórbrotins útsýnis yfir Viðeyjarsund.
Dómnefnd
Dómnefnd samkeppninnar skipuðu Gunnar Tryggvason hafnarstjóri, Líf Magneudóttir stjórnarformaður Faxaflóahafna og Vigdís Hafliðadóttir, listamaður, heimspekingur, sjónvarpskona og textahöfundur, sem jafnframt var formaður nefndarinnar.
Faxaflóahafnri – Tenging Íslands við umheiminn
Faxaflóahafnir tengja stærsta markaðs- og atvinnusvæði Íslands við umheiminn og miðin. Félagið rekur umfangsmestu hafnir landsins í Reykjavík, Akranesi, Grundartanga og Borgarnesi og leggur áherslur í að vera leiðandi í umhverfis- og öryggismálum við þróun snjallra og skilvirkra hafna framtíðarinnar.